والان مع الجزء الخامس
(14)
السلام عليكم ورحمة الله وبركاته
نستكمل معا اخواتى
شبهة جديدة سمعناها مؤخرا ان النقاب ده بدعة
ردا على الكلمة دى خلينا نفكر مع بعض شوية
ليه اللبس المحتشم ده بالذات هو اللى يتقال عنه انه البدعة؟؟
وليه اللبس الكاسي العارى مااتقالش عليه كده؟
اولا اجابة على السؤال الاول النقاب عمره ماكان بدعة وقريت مرة كلام ومش عارفة مصدره ان النقاب كان موجود حتى قبل ظهور الاسلام ايام الفراعنة !
تخيلواااااااااا :nooo: ومعرفش الكلام ده مصدره صح ولا لا
هذا الى جانب اننا عارفين انه كان لبس زوجات النبي صلى الله عليه وسلم واحنا عايزين نتأسي بهن ولو في اقل حاجة حجابهم
المهم ان النقاب مش بدعة
هتقولوا لى دليلك ايه؟؟
اقولكم اولا مجتمعات كتيييييييييييييييييييير جدا في دول اسلامية عربية وغير عربية يكاد يكون النقاب فيها هو اللبس الرسمى مش موضوع انه فرض ولا قرار جمهورى خدته الدولة على نساء بلدها
لكن لانه عرف او تقليد من تقاليد البلد دى
وامثلة على ذلك
السعودية-اليمن-كتير من دول الخليج-بعض الاجزاء في العراق- واخيرا مصر
بتقولى مصر ؟...مصر ؟؟..مصر ؟... ازاااااااى ؟
اقولكم فاكرين مسلسل بين القصرين (انا بقول للى كان شافه زمان في التليفزيون مش عايزة حد يروح يشوفه
)؟فاكرين لبس الستات فيه كان شكله عامل ازاى؟؟
كان شكله كده
لولا الله يسامحه قاسم امين هو السبب عندما طالب بتحرير المرأة وعندها طلع المثل القائل(خلعت برقع الحياء) ده غير حركات تحرير المرأة لقاسم امين واعوانه وسعد زغلول وبعض النساء اللى كانوا بينادوا بحرية المرأة امثال هدى شعراوى وصفية زغلول نفسها
ولا اقصد بكده ان التى لاتغطى وجها معندهاش حياء !
لا ابدا والله لااقصد ذلك
لكن اقصد ان النقاب كان عرف سائد في مصر برضه بمعنى انه ليس شئ مستجد او بدعة حلت
وبالنسبة للسؤال التانى
وليه اللبس الكاسي العارى مااتقالش عليه كده؟
فنقول سبحان الله على خطوات الشيطان وكانت دى خطته من زمان في افساد الشعوب(ليريهما ما وورى عنهما من سوءاتهما) لعب على الحبل ده واثار الشهوات وفعلا كان على خطوات محسوبة بحيث ان فكرة الغطاء الكامل دى تندثر تماما وتنسي حتى ظننا دائما بسبب التشويه الاعلامى للماضي من خلال الافلام القديمة(ابيض واسود) ان ماضينا كان اسود وكانت النساء فيه عرايا وشرب للخمور...وتبرج..و ..و !!
الخلاصة ان النقاب ده كان شئ وارد في مجتمعنا وفي كثير من الدول العربية الاخرى العرف السائد فيها هو الغطاء الكامل على اختلاف اشكاله فمثلا
النقاب المصرى في مصر(ويختلف في شكله عن السعودى) والنقاب في السعودية- والمنديل في سوريا وبلاد الشام -والملحفة في دول الخليج وبيستخدموها ايضا في تغطية وجوههم بها-والبرقع في افغانستان
ااااه....فاكرين ايام حرب امريكا على افغانستان والقضاء على حركة طالبان فيها؟
نبذة تاريخية
حركة طالبان دى كانت جماعة ماسكة الحكم في افغانستان بس كانت فارضة عليه نظام مشدد فامريكا استغلت النقطة دى كتلكيكة عشان تقضي علي افغانستان وعلى هذا الحكم الاسلامى اللى فيها وبالنسبة للنظام المشدد يعنى مثلا فرضت على النساء ان يكون حجابهم هو البرقع
عارفين البرقع ده شكله عامل ازاااى ؟
ده النقاب اللى بنلبسه ده مايساويش فتلة جنبه!
ده كان عبارة عن كأنك جبتى ملاية تقيلة طويلة ورموها فوق راسك لحد قدميك وعند مكان العينين القماش خفيف شوية
دى اول حاجة وفي حاجة كمان اصعب من فرضهم للبس ده ان اللى كانت بتمشي من غيره بتضرب بالكرباااااج وشفت المنظر ده بعينى في النشرة وكمان كانوا بيفرضوا على النساء ان مفيش تعليم ومفيش خروج من البيت خاااااااااااااااااااااااالص ولو رجل كان مر في السوق ووجد امرأة كان يفضل يطاردها بالكرباج لحد ماتروح بيتها حتى انى قرأت ان التعليم عندهم كان بيكون في السر...في الخفاء...بنت مثلا عدت من تحت النظام ده واتعلمت او ابوها علمها تروح البيوت وكأنها بتزور واحدة ويجمعوا بنات ونساء العمارة في البيت وتعلمهم!!
لكن للاسف
بعد القضاء على حركة طالبان في افغانستان النساء هناك كانوا زى اللى( كانوا في جرة وطلعوا لبرة ) الا من رحم ربي وثبتهن....فلقد رأيت لقاء مع احدى الكاتبات الافغانيات اللاتى تطالبن بحرية المرأة وانشغل وانحصر تفكيرهم في هذه البدعة ولقاء مع طالبة جامعية افغانية يتحدثن عن شعورهن بالفرح بعد القضاء على حركة طالبان اللى كانت عاملالهم كبت بفرضها لبس البرقع عليهن
رأيتهن بعد الغطاء الكامل الذى لايحمل اى معلم من معالم الزينة... نصف شعورهن ظاهر بل اغلبه وهن يضعن قطعة قماش لاتسمن ولا تغنى
في نظرى مالهاش لازمة الا انها عاملالى شخصيا ازمة ... والهواء يحرك الايشارب ويظهر النصف الباقي المغطى...اهذا الذى اردتموه لانفسكن ؟؟؟
بغض النظر عن الحالة السياسية التى فرضتها حركة طالبان على النساء الافغانيات ولكن شرع الله هو الشرع!!
ده حجابك انا مش بقول حتى يرجعوا يغطوا وجوههم مرة تانية لكن الكبت اللى كان عليهم مش مبرر انهم حتى لايغطوا شعورهن وصدورهن بالحجاب؟
وجزاكم الله خيرا...وللحوار بقية ان شاء الله
السلام عليكم ورحمة الله وبركاته
(15)
السلام عليكم ورحمة الله وبركاته
تكملة لشبهة ان النقاب بدعة
طب ده النقاب اولا كان من لبس زوجات النبي صلى الله عليه وسلم وهؤلاء هم قدوتنا اننا نسير على دربهن
ثانيا....ايه اللى يجبر بنت او فتاة او امرأة انها تبتدع في حاجة زى دى؟
والمعروف عن النساء ان طباعهم بتميل الى الزينة واظهار المفاتن فاحنا جبلنا على كده!!
اتخلقنا كده بنحب نتزين!!
لا وكمان ممكن تمشي لابسة اسود في اسود!!
لا وكمان ممكن تبقي لابسة ملحفة كبيييييييييييييرة وطوييييييلة!
لا وهتاخد تريقة وانتقادات من كل اللى حواليها!
لا وممكن تتهم انها بتتبع احدى الجماعات الاسلامية!
لا وتتهم بالتشدد والتطرف وممكن تفقد اصحاب كتير لها بعد لبسها النقاب!
لا وممكن ان كانت متزوجة زوجها يرفض ويقوم العائلة عليها!
وان كانت مخطوبة ممكن خطيبها يرفض يقول لها انا عايز اشوفك على طول!
وهتدخل في صراعات مع الاسرة والاهل(بالرغم من اننا بنادى بالهدوء في اقناعهم) ولو كان الاهل فيهم عنف وغلظة شوية ممكن يمنعوها من الخروج من البيت خالص ولا تروحى كلية ولا تشوفي صحابك وتقعدى في البيت زى الخادمة!!
يعنى موضوع لبسها النقاب ظاهره كده كله خسارة في خسارة
لكن بالرغم من كلللللللللل ده تلاقي بنات نفسها جدا جدا تلبس النقاب وتدعى ربنا وتبتهل له وتدعى لاهلها انهم يوافقوا
وتفرح جدا لانتقاب واحدة من صاحباتها وممكن عينها تدمع وهى بتسلم عليهاطب بعد ده كلللللللله ايه اللى يخلى بنت تقدم بنفسها على خطوة النقاب والظاهر منه انه يخالف هوى كل بنت طبيعية
وهو يتلخص في كلمة واحدة
(((رضا الله سبحانه وتعالى)))
وابراء الذمة امامه...احنا مالناش دعوة ياربي بالعرى اللى بيحصل دلوقتى
قال الله تعالى :
{ وَالَّذِينَ جَاهَدُوا فِينَا لَنَهْدِيَنَّهُمْ سُبُلَنَا وَإِنَّ اللَّهَ لَمَعَ الْمُحْسِنِينَ } [العنكبوت : 69]
وكما قلت من قبل ان الظاهر من لبس البنات للنقاب انه
يخالف هوى كل بنت طبيعية!!
نفسها تلبس شيك...نفسها تلف الايشارب اللفة الجديدة اللى كل البنات بيعملها وتعمل وتلبس الموضة الجديدة اللى طالعة دلوقتى انها تلبس (شال) على شكل بلوفر
وتلبس حجاب وتلفه spanish او...او...
يعنى انا ذهلت لما سمعت سيدة تقول لى
ان كلمة (عدم ابداء الزينة ) ليس من شروط الحجاب ؟؟!!!
انا لله وانا اليه راجعون
هى دى فتنة زماننا البنت تبقي محجبة ولبسها محترم جدا لكن تتفتن من المظاهر اللى حواليها ويبتدى حجابها يقل
يعنى مثلا والكلام ده قريته على لسان بنات وناس اعرفهم شخصيا حوالى
بنت تقول انها كانت بتلبس خمار (عارفين شكل الخمار) مفيهوش اى زينة وفيه كل شروط الحجاب اللى ربنا امرنا به
فاول ماطلعت موضة الخمار اللف وهو عبارة عن ايشارب سادة طويل وعريض على شكل مستطيل ابتدت تلبسه وسابت الخمار!
وفضلت ماشية به لحد ماطلعت موضة الايشاربات الايطالى المشجرة والمنقوشة بالوانها الجميلة جدا جدا (ومحدش يقدر ينكر ان الوانها مش جميلة) اللى شغالة في مصر الان وابتدت تلبسها دلوقتى وتركت الخمار !!
هى دى بقي خطوات الشيطان اللى بنقول عليها.... يستدرجك واحدة واحدة
فهل ننصره ؟؟؟
بل عليه اللعنة!!! لازم نحاربه !!!
وهو مش هيسيبنا....فنقفل عليه مداخله عندنا ونتوكل على الله ونسأل الله الثبااااااات على دينه وان يصرف قلوبنا على طاعته
وجزاكم الله خيرا
السلام عليكم ورحمة الله وبركاته
بسم الله الرحمن الرحيم
(16) والاخيرة في السلسلة الاولى
السلام عليكم ورحمة الله وبركاته
نستكمل معا اخواتى
هقول كلمة اخيرة اختتم بها السلسلة الاولى اللى بتخص دعوتنا للنقاب ومن بعدها هنبدأ سلسلة جديدة ان شاء الله...
فكرى اختى وانتى بتلبسي النقاب او بتفكرى فيه في ثوابك ان شاء الله واحسنى الظن بالله وكونى على ثقة ويقين بتعويضه سبحانه وتعالى وتوكلى عليه يعنى انا قبل ما البس النقاب ناس كتير حذرتنى من نظام امن الدولة والكلام ده وكان ممكن اترعب واخاف واقول ايه اللى يخلينى ارمى نفسي في التهلكة!!
لكن سبحان الله والله ما اتأثرت بالحتة دى بالذات وما اتهزيتش منها بالرغم من انها لوحدها كفيلة انها تصرف نظر اى واحدة تفكر في لبس النقاب لكن سبحان الله لما تستعينى بالله وتحسنى الظن به اكيد هيحفظك ويصونك والله ساعات بتخيل انى هقول يارب احفظنى الاقيه سبحانه وتعالى استجاب على طول لانى احسنت ظنى به سبحانه وتعالى وهو القائل(أنا عند ظن عندى بي)
ظننتى انه الحفيظ هيحفظك... ظننتى انه الوكيل وتوكلتى عليه هيكون سبحانه وتعالى نعم الوكيل... ظننتى انه الرزاق هيرزقك من حيث لاتحتسبي.. ظننتى انه الجبار هتلاقيه سبحانه وتعالى بيجبر بخاطرك واحزانك في اشد احتياجك له
ولو النقاب اتأخر شوية !!
ماتحزنيش!!...بالعكس دى فرصة وجت لك من السماء انك تقربي فيها من ربنا اكتر واكتر وتدعى كتير.. كتير غيرك بيعانوا من فترات الفتور في العبادة
ولو زاد رفض الاهل !!
برضه ماتحزنيش!... دى فترة اختبار وان شاء الله مع اخلاصك هيجى اليوم اللى تلبسيه فيه
ولو صحابك ابتدوا يبعدوا عنك بعد النقاب !!
ماتحزنيش...واعتبرى ان ده اختبار لمدى حبهم ليكى هل بيحبوكى في الله؟
هل حبهم ليكى ده بيعود عليكى بخير زيادة في الطاعة والعبادة ولا بياخدك وبينزل بيكى لتحت؟؟
يعنى انا بشبه الفترة دى انها زى الغربال بتفرق لك فعلا بين الاصحاب الحقيقين اللى حبهم ليكى فعلا حب خالص وبيفرحوا لك في الخير وانك تزودى حجابك والصحاب التانيين اللى اول ماتزودى في حجابك يسبب عندهم نوع من النفور لكلامك او لاى تصرف يصدر منك لمجرد انك منتقبة بمفهوم ان المنتقبات متشددات !!
وساعات بتقلب مع بعضهم لشعور بالغيرة !
وبينسوا ساعتها الصداقة وكل المفاهيم الجميلة دى
ودعوتى هنا للنقاب انا مش بشدد بها عليكن
هى مجرد نصيحة او دعوة انكم تجربوا حاجة زى دى وانا لو كنت شايفة فيها عيوب او تقييد مكنتش فتحت الغرفة دى واحمل نفسي وزر التشديد على مسلم او ان واحدة تدعى على بالذات بعد زماننا اللى عايشين فيه ده واللى كثرت فيه الفتن...صدقونى بنفتتن! !!
عمالين ننحدر مش بنزيد... وبنات بعد الالتزام ولبس الطويل تيارالاختلاط جرفهم ونسوا كل ده!!
بلاش نغلق تفكيرنا في مفهوم كلمة فتنة على ان اللى تلبس النقاب لازم اللى تكون راااائعة الجمال...لا طبعا...
والا مكنتش الفتنة اثرت فيها باى شكل
وده عامل الثبات اللى بندعى ربنا به
فدعوتى هنا تحمل مفهوم اكتر للحجاب الشرعى اللى مستوفي كل شروطه اكتر من مجرد تغطية الوجه فقط لان مش قطعة القماش اللى بنغطى بها وجوهنا هى اللى بتفرق عند ربنا في زيادة التقوى او عدمه
وعشان كده هبدأ سلسلة جديدة في دعوتنا للنقاب وهى (أخلاق النقاب )
وده المفهوم الجديد اللى عايزين نوصله هو يمكن يكون متعلق اكتر بالمنتقبات فعلا بس انا عايزة اخواتنا غير المنتقبات كمان يشاركوا معانا فيه لان هى دى وجهة النظر المعاكسة لواقعنا وهم مرآتنا اللى هنشوف فيها عيوبنا باذن الله...
وعمر بن الخطاب رضي الله عنه كان بيقول
(رحم الله من أهدى إلينا عيوبنا )
انتظرونى ان شاء الله
السلام عليكم ورحمة الله وبركاته
